Монголын Хот Байгуулалтын Хөгжлийн Танхимаас жил бүр зохион байгуулдаг "Шилдэг барилга" шалгаруулах арга хэмжээнд "Монгол улсын баруун бүсийн барилга, барилгын материалын үйлдвэрлэлийн их бүтээн байгуулалтын эхлэл болсон инновацийг нэвтрүүлсэн орчин үеийн үйлдвэрийн барилга байгууламж" үндэслэлээр 2024 оны Шилдэг барилгаар шалгарсан "Вестерн Холд" ХХК-ийн гүйцэтгэсэн ХОВД ЭКО цементийн үйлдвэр. "БАРУУН БҮСИЙН ХӨГЖЛИЙН ТУЛГУУР" Ховд эко цементийн үйлдвэр нь жилд 300,000 тонн портланд цемент үйлдвэрлэх хүчин чадалтай, хуурай аргын дэвшилтэт технологи бүхий байгальд ээлтэй цементийн үйлдвэр юм. “Ховд эко цемент” үйлдвэр нь Улаанбаатар хотоос 1450 гаруй, Ховд аймгийн төвөөс 15 км зайд Буянт сумын нутаг дэвсгэрт байрладаг бөгөөд цементийн гол түүхий эд шохойн чулууны орд Шохойт уул нь үйлдвэрээс 1.8 км зайд оршдогоороо давуу талтай юм. Цементийн орцын 80 хувийг шохойн чулуу бүрдүүлдэг бол үлдсэн 20 хувийг нь гөлтгөнө, төмрийн хүдэр, нүүрс, занараас бүрддэг. Цементийн үйлдвэр Баруун бүс нутагт байгуулахаар сонгосон газрын бас нэгэн давуу тал нь түүхий эдээ татахад хамгийн тохиромжтой байршил байсан юм. Одоогоос дөрвөн жилийн өмнө анх шавыг нь тавьж үйлдвэрийн бүтээн байгуулалт эхэлж, дэлхий дахиныг хамарсан цар тахлын улмаас эдийн засаг царцаж олон саад бэрхшээл байсан ч зорьсон зорилтоосоо няцахгүй зүтгэсээр энэхүү үйлдвэрийг бий болгосон. Ховд эко цементийн үйлдвэрийн цогцолбор нь 30 орчим байгууламжаас бүрдэж, байгалийн түүхий эд эрдсүүдийг байгаль орчинд ээлтэй, дэлхийн дэвшилтэд технологиор боловсруулж өндөр чанартай бүтээгдэхүүн гарган үйлдвэрлэж байна. Монгол хүн эх орондоо ажиллах, өөрийн эзэмшсэн мэргэжил, ур чадвараар бахархах, цаашид хөгжин дэвших хүсэл эрмэлзлийг дэмжих таатай нөхцлийг бий болгохоор зорин ажиллаж байна. Үйлдвэр бүрэн ашиглалтад орсноор 350 ажлын байр шинээр бий болж, нийт ажилтнуудын 97 хувийг орон нутгийн иргэд болон ойролцоох аймаг сумдын ажилчдаар хүний нөөцөө бүрдүүлж байна. Орон нутгийн чадварлаг мэргэжилтнүүдийг нутагтаа ажиллах боломжоор хангаж байгаа нь залуусын хувьд маш их боломжийг нээж өгч байгаа юм.